Успешно реализиран Првиот Отворен ден на GS1 Македонија

[Фотографии >>] [Презентации >>]

На 21-ви Јуни 2017 година во хотелот Александар Палас – Скопје успешно за прв пат се одржа Прв Отворен ден на GS1 Македонија со наслов „Дали сте подготвени за дигиталната ера во трговијата?“. Атрактивните теми привлекоа големо внимание меѓу македонските компании. Регистрирани беа 178 учесници, а на самиот настан присуствуваа повеќе од 150 присутни.

Настанот беше поддржан од 19 компании членки на GS1 Македонија од кои винарија СТОБИ организираше дегустација на своите вина, Алма-М со НЕСКАФЕ се погрижи за кафе паузата, а Кожувчанка со своите безалкохолни пијалаци ги освежуваше присутните за време на кафе паузата и организираниот коктел. Вредни награди за време на настанот преку учество во лотарија обезбедија: Алкалоид, Витаминка , Даути Комерц, Макпромет, Веропулос, Зегин, Реплек Фрам, Нелт Ст, Орбико, Тргопродукт Тинкес, Свислион, Виталиа, Зоралек и Кенди . Додека Инфоркод технички го поддржа настанот со изработка на ИД картички и обезбедување на опрема за читање на бар кодови.

Самиот настан побуди голем интерес меѓу македонските медиуми кои пред почетокот на настанот учествуваа на пресот во голем број.

Настанот го отвори м-р Живко Мукаетов, генерален директор на „Алкалоид“ АД Скопје кој ја нагласи потребата од имплементирање на глобални стандарди во работењето на компаниите во Република Македонија вклучувајќи ги и GS1 стандардите. „Алкалоид“ АД Скопје е прва компанија која што е зачленета во GS1 Македонија.

Кратко обраќање на настанот имаше и директорот на GS1 Македонија, г-ѓа Слаѓана Милутиновиќ, која ја објасни идеата и потребата од организирање на овој настан во Република Македонија.

Британски експерт за "Омни-канал" трговија Дејвид Смит од Глобалната GS1 канцеларија во Брисел, зборуваше за моменталните трендови во електронската трговија и за тоа како GS1 може да им помогне на компаниите во исполнувањето на потребите на денешните и идните потрошувачи.

Продажбата на далечина е се повеќе застапена и прифатена од крајните потрошувачи, секоја година е се помасовен, а обртот на средства преку онлајн трговијата е од година во година се поголем. Овој тренд неминовно ќе ја зафати и нашата држава. Нашите производители и трговци треба да бидат подготвени да одговорат на новите предизвици со цел да го прошират својот пазар, да стекнат нови деловни партнери и потрошувачи како во Македонија така и надвор од нашите граници.

М-р Александар Кедијоски од GS1 Македонија одржа презентација за повеќе годишниот проект на GS1 Македонија за создавање на национален каталог со производи на македонските компании во кој на едно место крајните потрошувачи, трговците и дистрибутерите ќе можат да пронајдат информации за македонските производи и нивните производители.

Првиот дел од предавањата заврши со презентација на г-дин Сергеј Зафироски од Инсајдер ИД – Скопје. Со својата презентација „Практична примена на Глобалната класификација на продукти GPC во KPI (Key Performance Indicators) анализите“ покажа како практично може да биде применета Глобалната класификација на продукти на GS1 при KPI анализите и како оваа алатка може да помогне во зголемувањето на профитот на трговците.

На кафе паузата се одржа и првото извлекување на наградите. Без извлечени 10 добитници на богати пакети од поддржуваните на настанот. Додека траеше извлекувањето, гостите се освежуваа со различните вкусови на Нескафе и безалкохолните пијалаци на Кожувчанка.

Вториот дел на настанот како надополнување на првите три презентации од првиот започна со презентација на г-дин Славчо Бујароски од СИГМА СБ – Скопје. СИГМА СБ е првиот и единствен македонски EDI провајдер кој функционира во Македонија но и надвор од нејзините граници. Со својата презентација „Електорнска размена на документи за поголема конкурентност, ефикасност и заштеди во работењето“ покажа како да се зголеми ефикасноста, добие конкурентска предност и подобрат перформансите на компаниите кои одлучиле или ќе одлучат да имплементираат EDI во своето работење и комуникација со своите деловни партнери.

Г-ѓа Елена Јаневска од Виталиа Никола ДООЕЛ – Скопје ги сподели искуства и бенефити од онлајн продажбата на веб продавница на Виталија и ја нагласи потребата од следењето на моменталните и идните трендови во трговијата, како и однесувањето и барањата на крајните потрошувачи.

Вториот дел заврши со презентација на г-дин Горјан Атанасовски од НЕЛТ-СТ со практична презентација на употреба на EDI комуникацијата во оптимизирање на деловните процеси во Нелт-СТ.

На крај од настанот се одржа коктел со дегустација на вина од винарија СТОБИ, музички настап на Пламенка Трајковска - мали камерни состави и беа извлечени останатите добитници на дополнителните 65 награди.